Fransiýanyň kompaniýalar topary LVMH-iň kapitallaşdyrmasy 500 mlrd dollardan geçdi. Şeýlelik bilen, LVMH Ýewropada bu çäkden geçen ilkinji kompaniýa boldy. Bu barada Bloomberg agentligine salgylanyp, TASS habar berýär.
Onuň maglumatlaryna görä, kompaniýanyň paýnamalarynyň bahasy 0,3% ýokarlanyp, duşenbe güni 903,7 ýewro ýetdi, netijede kompaniýa 454 mlrd ýewro ($500 mlrd) bilen bahalandyryldy.
LVMH-iň kapitallaşdyrmasy Hytaýda bezeg harytlarynyň satuwynyň çalt ösmegi we ýewronyň hümmetiniň güýçlenmegi sebäpli ýokarlandy diýip, agentlik habar berýär. Bu netije birinji çärýekde satuwyň çalt ýokarlanmagy netijesinde LVMH dünýäniň iň uly 10 kompaniýasynyň hataryna gireninden soň iki hepdeden az wagtyň içinde gazanyldy diýip, Bloomberg belleýär.
Kompaniýanyň bahasynyň ýokarlanmagy dünýädäki iň baý adamyň, LVMH-iň prezidenti Bernar Arnonyň baýlygyny-da artdyrdy. Bloomberg-iň milliarderler indeksine laýyklykda, ol tas 212 mlrd dollara barabar.
