iOS 17-de ilkinji gezek iPhone-nyň ulanyjylaryna diňe App Store-dan däl, eýsem, del çeşmelerden hem enjamlara goşundylary ýüklemäge mümkinçilik berer. Bu barada Bloomberg-iň insaýderi we žurnalist Mark Gurman habar berýär.
Bu girizilen täzeligiň sebäbi 2022-nji ýylyň 1-nji noýabrynda güýje giren ÝB-niň sanly bazarlar kanunynyň (DMA) täze düzgünleri bolar. Bu düzgünlere laýyklykda, Apple we Google ulanyjylara üçünji tarapyň goşundy dükanlaryna girmäge rugsat bermeli. Şeýlelik bilen, döredijiler App Store we Play Store dükanlarynyň 15% we 30% tutumlaryndan sowlup geçip bilerler.
Apple bu kanun taslamasyna garşy çykmaga synanyşdy. Delil hökmünde kompaniýa tassyklanmadyk çeşmelerden goşundylary gurmagyň şahsy durmuşyň eldegrilmesizligini we howpsuzlyk goraglaryny bozjakdygyny öňe sürdi. Şeýlelik bilen, ulanyjy galplyk, zyýanly goşundy üpjünçiligi we beýleki meselelere has ýakyn bolar. Şeýle-de bolsa, Apple Ýewropa Bileleşigini muňa ynandyryp bilmedi.
Täzelikleriň nähili işlejekdigi entek belli däl. Belki, kompaniýa diňe ÝB-niň ýurtlarynda goşundylary gurmakdaky çäklendirmeleri aýyrar. Gurman Apple -iň geljek ýylyň başyna, Ýewropa kanunlarynyň täze düzgünlerine laýyklykda, daşarky göçürip almak goldawyny durmuşa geçirmegi meýilleşdirýändigini tassyklady.
