Beýik Britaniýanyň patyşasy Karl III-niň şahsy emlägi 600 mln funt sterlinge ($745 mln) ýetýär, bu bolsa onuň ejesi, şa aýaly Ýelizaweta II-niň (1926-2022) emläginden ýokarydyr. Bu barada The Sunday Times gazeti habar berýär diýip, TASS belleýär.
Makalada bellenilişi ýaly, onuň Aly Hezretleri şeýle netijäni diňe bir ejesinden alan miras arkaly däl-de, eýsem Kornuoll gersogçylygyny üstünlikli dolandyrmak bilen gazandy. Gürrüň monarha heniz tagt mirasdüşeri, Uels şazadasy Çarlz bolan wagty degişli bolan emläkleriň jemi barada gidýär. The Sunday Times tarapyndan 2022-nji ýylyň maý aýynda neşir edilen Birleşen Korollygyň iň baý ýaşaýjylarynyň sanawynda Ýelizaweta II-niň baýlygy 370 mln funt sterling ($460 mln) diýlip hasaplandy.
Gazetiň hasaplamalaryna görä, 2011-nji ýyldan 2022-nji ýyl aralygynda Uels şazadasy gersogçylygyň girdejisini 42,6%, ýylda 25,4 mln funt sterlinge ($31,5 mln) çenli artdyryp bildi. Gazet diňe 2012-nji ýyldan 2022-nji ýyl aralygynda döwlet baştutanynyň graflyga eýeçilik etmekden 212,7 mln funt sterling ($264 mln) möçberde girdeji alandygyny habar berýär.
The Sunday Times 74 ýaşly monarhyň zatlara aýawly garaýandygy bilen hem bellidigini nygtaýar. Ýagny, ol, köplenç, birnäçe ýyl mundan ozal satyn alnan egin-eşikleri geýýär, şeýle-de elektrik energiýasyny tygşytlamak meselesine ünsli çemeleşýär.
