Awtoulagyň belgisi Dubaýda (Birleşen Arap Emirlikleri) auksionda rekord 55 million dirheme (15 million dollar töweregi) satyldy. Bu barada duşenbe güni Bloomberg agentligi habar berdi.
Onuň habaryna görä, Emirates Auction kompaniýasy şenbe güni haýyr-sahawat auksionynda P7 awtoulag belgisini satdy. Aýdylyşyna görä, ondan gelen pullar Birleşen Arap Emirlikleriniň wise-prezidenti we premýer-ministri, Dubaýyň hökümdary Muhammet bin Raşid Al Maktumyň mätäçlere kömek bermek maksatly "1 milliard paý" atly ynsanperwerlik başlangyjyny durmuşa geçirmäge gönükdiriler. Guramaçylar auksionda ýeňijiniň adyny aýan etmediler.
BAE-de auksionda awtoulag belgilerini satmak häli-şinde bolýan ýagdaý. Öňki rekord şeýle auksionlaryň birinde 2008-nji ýylda goýlupdy. Ýerli telekeçi Said Abdel Gaffar Hury Abu-Dabide 1 diýen sanly belgi üçin 52,2 million dirhem (häzirki walýuta hümmeti boýunça takmynan 14,2 million dollar) töledi.
