2022-nji ýylyň jemi boýunça kripto milliarderler baýlygynyň 75%-ini ýitirdi. 2023-nji ýylyň mart aýyna çenli 12 aýyň içinde pudagyň iň baý 19 adamsynyň umumy maýasy 140 milliard dollardan 30 milliard dollara çenli azaldy. Bu barada Forbes USA habar berýär.
2021-nji ýylyň jemi boýunça neşir 2022-nji ýylyň ýazynda umumy baýlygy 140 milliard dollar bolan 19 sany kripto milliarderiň sanawyny düzdi. Häzirki wagtda sanawdan on adam milliarder derejesini ýitirdi.
Munuň sebäbini Forbes kripto bazaryndaky düýpli pese gaçyşlyk, galplykda aýyplamalar, hökümetiň kazyýet arzalary, azar bermeler we beýleki meseleler bilen düşündirýär.
Iň uly Binance kriptobiržasyny esaslandyryjy Çanpen Çžao kriptowalýutalar pudagyndaky iň baý milliarder bolmagynda galýar. Şeýle-de bolsa, onuň baýlygy bir ýylda 65 milliard dollardan bolanlygyndan 10,5 milliard dollara çenli azaldy. Täzelenen sanawda ikinji orunda bary-ýogy 100 000 dollar ýitiren Jed Makkaleb (2,4 milliard dollar) durýar.
Iň uly pese gaçyşlyk batan FTX kriptobiržasyny esaslandyryjy Sem Benkman-Fridiň çökmegi boldy. Şondan soň telekeçi kezzaplykda aýyplanyp tussag edildi. 12 aýyň dowamynda FTX-nyň öňki ýolbaşçynyň baýlygy 24 milliard dollar bolanlygyndan 4 million dollara çenli azaldy.
CoinMarketCap-yň maglumatlaryna görä, 2022-nji ýylyň mart aýyndan bäri bir ýylda kripto bazarynyň kapitallaşmasy takmynan 700 milliard dollar azaldy we 1 trillion dollar boldy.
