Soňky bir ýylda dünýäde kriptowalýuta millionerleriniň sany 40% artyp, 241 700 adama ýetdi. Bu barada Henley & Partners konsalting kompaniýasynyň hasabatyna salgylanyp, CoinDesk habar berýär.
Kriptomillionerleriň sanynyň artmagy bazaryň ösüşi bilen baglanyşyklydyr: iýunda onuň kapitalizasiýasy 3,3 trln dollara ýetdi, bu bir ýyl ozalkydan 45% köpdür.
Ösüşiň esasy çeşmesi bitkoin bolmagynda galýar. Hasabat maglumatlaryna görä, BTC-de 1 mln dollardan gowrak bahaly portfeli bolan adamlaryň sany 70% artyp, 145 100 adama ýetdi. Kriptowalýutalarda azyndan 100 mln dollara eýeçilik edýän adamlaryň sany 450 maýadara barabar, 36 adam bolsa eýýäm milliarder hasaplanýar.
Bellenilişi ýaly, sanly aktiwlere bolan çemeleşme hem üýtgeýär: ozal bitkoin, esasan, soňundan gymmat satmak üçin satyn alynýardy. Häzir ol ygtybarly girew we kapital ýygnamak üçin esasy walýuta hökmünde kabul edilýär.
Henley & Partners-iň maglumatlaryna görä, kriptowalýutalaryň merkezleşdirilmedik bolmagy dünýäde baýlygyň paýlanyşyny hem üýtgedýär. Köp maýadarlar düzgünleşdiriji töwekgelçilikleri azaltmak we amatly salgyt düzgünleri bolan ýurtlarda bank hyzmatlaryna elýeterli bolmak üçin raýatlyk ýa-da ýaşaýyş ygtyýarnamasyny almak maksatnamalaryna işjeň gatnaşýar. Kripto-maýadarlar üçin Singapur, Gonkong, ABŞ, Şweýsariýa we BAE öňdebaryjy ýurtlar hasaplanýar.
Henley & Partners-iň hususy müşderiler bilen işlemek boýunça bölüminiň başlygy Dominik Wolek kriptowalýutanyň geografiki çäklendirmeleri aradan aýyrýandygyny belledi. “Bary-ýogy 12 söz Sýurihden-de, Çžençžoudan-da elýeterli boljak bitkoinde milliardlarça dollary saklamaga mümkinçilik berýär”.
