Telegram messenjeriniň esaslandyryjysy we işewür Pawel Durow bitkoiniň geljegi barada pikirleri bilen paýlaşdy. Onuň pikiriçe, kriptowalýutanyň bahasy bir million dollara ýetip biler. Ol öz çaklamasyny žurnalist Leks Fridman bilen söhbetdeşlikde aýtdy.
Durow Telegram-y “ýitgili taslama” diýip atlandyrdy we messenjeriň hut bitkoine maýa goýumlaryň netijesinde işlemegini dowam etdirýändigini aýtdy.
Şeýle-de, ol sanly bilen adaty walýutalaryň arasyndaky tapawuda ünsi çekdi. “Hökümet puly ertir ahyrzaman boljak ýaly çap edýär. Bitkoini bolsa hiç kim çap etmeýär. Onuň bellibir wagtda saklanjak öňünden kesgitläp boljak inflýasiýasy bar. Bitkoin çynlakaý we uzak möhletli, beýleki kagyz pullar bolsa kesgitsiz” – diýip, telekeçi belledi.
Şondan tiz wagtdan soň Durow Astanadaky Digital Bridge 2025 forumynda çykyş edip, Gazagystanda Alem AI emeli aň barlaghanasynyň döredilendigini mälim etdi.
Işewüriň aýtmagyna görä, ilkinji taslama “Telegram bilen Gazagystanyň superkompýuter klasteriniň arasyndaky hyzmatdaşlyk” bolar.
“Soňky birnäçe aýda biz täze tehnologiýanyň – blokçeýn bilen EA-nyň birleşmeginiň üstünde işledik. Ol bir milliarddan gowrak adama merkezleşdirilmedik kompýuter ulgamy tarapyndan döredilen EA funksiýalaryny ulanmaga mümkinçilik berer” – diýip, Durow aýtdy.
Soňra KHBS Telegram-yň esaslandyryjysynyň Gazagystanyň Prezidenti Kasym Žomart Tokaýew bilen duşuşandygyny habar berdi. Duşuşygyň dowamynda bilim, emeli aň we kiberhowpsuzlyk pudaklarynda hyzmatdaşlyk etmek meseleleri ara alnyp maslahatlaşyldy.
