ABŞ-nyň Haryt nyşanlary we patentler edarasynyň (USPTO) saýtynda Apple kompaniýasyndan berlen täze arza peýda boldy, onda AirPods seriýaly nauşnikler üçin ses gowulandyryş ulgamy suratlandyrylýar. Bu barada GizmoChina neşiri habar berýär.
Täze tehnologiýa "Wirtual diňleýiş gurşawyny ölçemek" diýip atlandyrylýar. Arzada beýan edilişine görä, ol jaýyň akustiki aýratynlyklaryndan ugur alýan nauşnikdäki sesi awtomatiki kalibrlemegiň mehanizmi bolup durýar. Patentiň beýanynda aýdym diňlemek we awtoulagda, synp otagynda, otluda, otagda we beýleki ýerlerde wideo görmek üçin sazlamagyň ýollary beýan edilýär.
Sazlamada nauşnigiň mikrofonlarynyň, şeýle hem hasaplaýyş bölümleriniň işlediliş usullary bolar diýip bellenilýär. Algoritm adamyň haýsy otagdadygyny kesgitlär, gulak geçelgesindäki akustiki basyşy ölçär we ses ýa-da wideo faýlyň asylky ölçeglerine laýyklykda sesi sazlar.
Kompaniýanyň bu pikiri durmuşa geçirjegi-geçirmejegi entek belli däl. Adatça, Apple-iň köpçülikleýin habar beriş serişdeleri tarapyndan äşger edilen patentleriniň köpüsi diýen ýaly konsepsiýa bolmagynda galýar.
