Ýewropa Bileleşiginiň ýurtlarynyň ilaty 2100-nji ýyla çenli 6% azalar diýip, ÝB-niň statistika gullugy Ýewrostat çaklaýar.
2022-nji ýylyň 1-nji ýanwaryndan 2100-nji ýylyň 1-nji ýanwary aralygynda ÝB döwletlerinde ýaşaýjylaryň sany 27,3 mln, 420 mln adama çenli azalar. Şol bir wagtyň özünde 2022-nji ýylda ilatyň sany koronawirus bilen bagly azalmadan soň dikelip başlady diýip, Interfax.ru belleýär.
Deslapky maglumatlara görä, 2023-nji ýylyň 1-nji ýanwaryna çenli ÝB-de 2021-nji ýyldaky 443,2 mln adam bilen deňeşdirilende, 451 mln adam ýaşaýardy. 2026-njy ýylda ilatyň sanynyň iň ýokary derejä – 453 mln adama ýetmegine garaşylýar.
2022-2100-nji ýyllarda 19 ýaşa çenli ýaşaýjylaryň paýy 20%-den 18%-e, 20 – 64 ýaşly adamlaryň paýy 59%-den 50%-e çenli peseler. 65 – 79 ýaş aralygyndaky we ondan uly ýaşdaky adamlaryň paýy, degişlilikde, 15%-den 17%-e we 6%-den 15%-e çenli ýokarlanar.
2021-nji ýyldaky ilat ýazuwynyň deslapky maglumatlary ÝB-niň 16 ýurdunda 2011-nji ýyl bilen deňeşdirilende ilatyň köpelendigini we dokuz ýurdunda azalandygyny görkezýär. 10 ýylyň dowamynda iň uly ösüşi Lýuksemburg (26%), Malta (24%) we Şwesiýa (10%), pese gaçyşy – Bolgariýa (11%), Horwatiýa (10%), Latwiýa (9%) we Litwa (8%) görkezdi.
2021-nji ýylda ýaşaýjylaryň sany boýunça lider Germaniýa (83,2 mln), Fransiýa (67,9 mln), Italiýa (59 mln), Ispaniýa (47,4 mln) we Polşa (37 mln) boldy.
