Türkmenistanyň Magtymguly adyndaky Ýaşlar guramasynyň ýanyndaky «Arkadagly Ýaşlar» atly elektron žurnalyň 2023-nji ýyldaky üçünji sany okyjylara ýetirildi.
Üç dilde taýýarlanylýan žurnalyň täze sanynyň açylyş makalasynda türkmen halkynyň Milli Lideri, Gahryman Arkadagymyz Gurbanguly Berdimuhamedowyň «Ýaşlara gutlag» atly aýdymynyň täsirleri paýlaşylýar. Žurnalyň ilkinji sahypalarynda bu aýdym okyjylara dolulygyna ýetirilýär.
«Ülkäme toý bolup gelen ýazlarym» makalada mart aýynyň täzelikleri berilýär.
Şeýle hem žurnalda Oraza we Gurban baýramlary, Oraza aýynyň mukaddesligi barada täsirli söhbet açylýar.
Žurnalyň baş redaktorynyň «Bir nahal ekseň, ýaşyň baky» atly makalasy ählihalk bag ekmek dabarasyna bagyşlanylýar.
Mart aýynda Türkmenistanyň Magtymguly adyndaky Ýaşlar guramasynyň gatnaşmagynda geçirilen «Talyp gözeli», «Iň eýjejik gyzjagaz» atly bäsleşikleriň jemlerine bagyşlanan makalalar hem žurnalyň täze sanyndan orun alypdyr. Şeýle-de, Milli bahar baýramyny şöhlelendirýän çykyşlar okyjylara hödürlenilipdir.
«Türkmen tebigaty ― ynsan kalbynyň ylham çeşmesi» atly makala tebigaty goramak meselesi bagyşlanypdyr.
«Ylym giňişligine ak ýol» atly rubrikada bu gezek ýaş alymlaryň arasyndaky bäsleşigiň ýeňijileriniň ikisiniň ylmy gözleglerine orun berilýär.
«...Nusga bolup galsyn ilden-illere» atly makalasy hem türkmen gelin-gyzlarynyň el işlerine bagyşlanypdyr.
Ýeri gelende aýtsak, žurnalyň şu sahypalaryny ýaşlary dil öwrenmäge höweslendirjek makalalar bezeýär.
Elektron neşiriň täze sanynda ýaşlaryň döredijiligine aýratyn uly üns berlipdir.
Žurnalyň redaksiýasynyň «Türkmenistan Sport» halkara žurnaly bilen bilelikde yglan eden döredijilik bäsleşiginiň jemleri barada hem habar berlipdir. Şeýle-de, «Ýaş waspçy» bäsleşiginiň mart aýyndaky ýeňijisi yglan edilýär.
