Amerikaly aýdymçy Teýlor Swift karýerasynda ilkinji gezek özüniň ýedi albomy bilen Billboard 200 çartynyň top-40-yna girdi. Tutuş taryhyň dowamynda şeýle netijä diňe pop-sazynyň legendasy Uitni Hýuston ýetip bilipdi. Şeýlelikde, 33 ýaşly ýerine ýetiriji şeýle rekord netijesi bilen taryhda ikinji we häzirki meşhur ýyldyzlardan birinji aýdymçy boldy. Bu barada Billboard saýty habar berýär diýip, rbclife.ru belleýär.
Billboard çartynyň ilkinji 40-lygynda Teýlor Swiftiň aşakdaky plastinkalary görkezildi:
- Midnights (3-nji orun);
- Lover (13-nji orun);
- Folklore (14-nji orun);
- 1989 (19-njy orun);
- Red (Taylor’s Version) (22-nji orun);
- Reputation (26-njy orun);
- Evermore (31-nji orun).
Mundan başga-da, çarta Teýlor Swiftiň ýene iki albomy goşuldy: Fearless (Taylor’s Version) plastinkasy 52-nji orny, Speak Now 69-njy orny eýeledi.
Belläp geçsek, 17-nji martda Teýlor Swift “The Eras Tour” konsert saparynyň çäklerinde birinji konsertini berdi. Ol Glendeýl amerikan şäherinde geçirildi we aýdymçy öz repertuaryndan 40-dan gowrak aýdymy ýerine ýetirdi. Ýakyn wagtda Swift Tampada, Hýustonda, Atlantada, Naşwillde, Çikagoda, Detroýtda we Filadelfiýada hem çykyş eder.
Aýdymçynyň arsenalynda köp sanly abraýly baýraklaryň we rekordlaryň bardygyny bellemek gerek. 2019-njy ýylda ol American Music Awards tarapyndan onýyllygyň ýerine ýetirijisi adyna eýe boldy. Şeýle-de, ol Billboard-yň “Onýyllygyň zenany” baýragyny aldy. 2019-njy ýylyň awgustynda Forbes žurnaly 185 mln dollar girdejisi bolan aýdymçyny dünýäde iň köp girdeji gazanýan aýdymçy diýip saýlady. 2022-nji ýylyň noýabrynda Swift American Music Awards-yň birbada alty nominasiýasynda ýeňiş gazandy.
