2022-nji ýylyň IV çärýeginde Xiaomi kompaniýasy smartfonlara bolan global islegiň peselmegi sebäpli girdejisini ep-esli azaltdy. Hasabat çärýeginde kompaniýanyň girdejisi 23%, 66,05 mlrd ýuana çenli ($9,68 mlrd) azaldy. Şol sanda smartfon segmentinde girdeji 27% azaldy. Bu barada interfax.ru habar berýär.
Arassa girdeji 28,6% ýokarlanyp, 3,14 mlrd ýuana ýetdi. 2022-nji ýylyň jemi boýunça Xiaomi girdejisini 14,7% - 280,04 mlrd ýuana çenli azaltdy. Arassa girdeji tas on esse, 2,5 mlrd ýuana çenli azaldy.
Kompaniýa geçen ýyl daşary ýurt amallaryndan alnan girdejiniň 137,8 mlrd ýuan bolandygyny we munuň Xiaomi-niň umumy girdejisiniň 49,2%-ine barabardygyny belledi.
Geçen ýyl kompaniýa bir ýyl ozalky 190 mln birlige garşy 150,5 mln telefon satdy. Canalys kompaniýasynyň hasabyna görä, Xiaomi 2022-nji ýylyň jemi boýunça 12,8% bazar paýy bilen dünýäniň öňdebaryjy smartfon öndürijileriniň reýtinginde üçünji orny saklady.
Geçen ýyl Xiaomi-niň “akylly” telewizorlarynyň global satuwy bazaryň 5,6% pese gaçandygyna garamazdan, 0,6% ýokarlanyp, 12,4 mln birlik boldy.
Ýylyň başyndan bäri Xiaomi-niň kapitallaşdyrmasy 15,2% ýokarlandy.
