Smartfony düzýän bölekleriň bahasynyň ýokarlanmagy we ýat mikroshemalarynyň ýetmezçiligi smartfonlaryň gymmatlamagyna sebäp bolup biler, emma Xiaomi kompaniýasy bu ýagdaýyň alyjylara ýetirjek täsirini mümkin boldugyndan ýumşatmaga çalyşýar.
Kompaniýanyň baş direktory Leý Szýun emeli aň pudagy tarapyndan uly islegiň bolmagy sebäpli, ýat mikroshemalarynyň bahasynyň ýokarlanýandygyny düşündirdi. Bu bolsa komponentleriň ýetmezçiligine hem-de smartfonlaryň we kompaniýanyň beýleki önümleriniň önümçilik çykdajylarynyň artmagyna getirdi.
Onuň aýtmagyna görä, Xiaomi bahalaryň ýokarlanmagyny doly derejede ulanyjylaryň gerdenine ýüklemek islemeýär. Kompaniýa bahalardaky bolup biljek üýtgeşmeleriň alyjylar üçin uly tapawutly bolmaz ýaly dürli çäreleri ulanmagy göz öňünde tutýar.
Kompaniýanyň berýän maglumatyna görä, bu ýagdaý tutuş bazara täsir edýär. Käbir öndürijiler eýýäm girdejilerini azaltdy we täze enjamlary çykarmak meýilnamalaryna täzeden seretdi. Şeýle hem wagtyň geçmegi bilen başlangyç derejeli smartfonlaryň bazardan doly ýitip gitmegi hem ret edilmeýär.
Xiaomi-niň prezidenti Lu Weýbin kompaniýanyň iri ýat öndürijileri bilen hyzmatdaşlygy we önümçilik gerimi netijesinde has durnukly ýagdaýdadygyny mälim etdi.
Ol şeýle hem bahalaryň ýokarlanma döwrüniň 2027-nji ýylyň ahyryna çenli dowam edip biljekdigini belledi. Şeýle şertlerde smartfon öndürijileri has gymmat bahaly modelleri çykarmaga has köp üns berip biler.
