Kanadaly aýdymçy The Weeknd (Abel Tesfaýe) Ginnesiň rekordlar kitabyna «dünýäde iň meşhur ýerine ýetiriji» hökmünde girdi diýip, Billboard ýazýar. Bu ýazgy Ginnesiň web sahypasynda eýýäm hasaba alyndy we çap edildi. 33 ýaşly artist birbada iki dünýä rekordyny goýdy: Spotify-da onuň iň köp sanly aýlyk diňleýjileri bar we ol bu aýdym-saz platformasynda aýda 100 milliondan gowrak diňleýjini gazanan ilkinji aýdymçy boldy (ýagny 111,4 million).
Deňeşdirmek üçin, Maýli Saýrus häzirki wagtda aýda 82,4 million diňleýjisi bilen ikinji ýerde durýar - bu ýoň bolup ýaýran “Flowers” (“Güller”) aýdymy bilen “Endless Summer Vacation” atly albomy çykandan soň şeýle boldy. Aýdymçy bu aýdymy öňki ýoldaşy, aktýor Liam Hemsworta bagyşlapdyr.
Mundan başga-da, Tesfaýeniň 2020-nji ýylda çykaran “Blinding Lights” aýdymy, hyzmatyň döredilen gününden bäri Spotify-da iň köp ýaýran aýdymdyr. Häzirki wagta çenli ony 3,47 milliarddan gowrak adam diňledi. Aýdymçy Ed Şiranyň Shape of You (2017) aýdymy 3,38 milliard diňleýji bilen ikinji ýeri eýeledi. 2018-nji ýylyň 10-njy dekabrynda iňlis aýdymçysynyň hitiniň diňleýjisi ilkinji bolup 2 milliarda ýetdi.
