Gazagystanda daşary ýurtlularyň ýaşamak üçin şahadatnama almagyna mümkinçilik berýän hünärleriň sanawy tassyklandy

Gazagystanyň Ilatyň zähmet we sosial goragy ministrligi daşary ýurtlularyň ýaşamak üçin şahadatnama almagyna mümkinçilik berjek isleg bildirilýän hünärleriň sanawyny tassyklady. Sanaw saglygy goraýyş, maglumat we aragatnaşyk tehnologiýalary, ylym ýaly dürli ugurlarda 21 hünäri göz öňünde tutýar diýip, ru.sputnik.kz habar berýär.

Isleg bildirilýän hünärlere eýe bolan daşary ýurtlular içerki işler edaralarynda tölege ukyplylygyny tassyklamazdan ýönekeý görnüşde ýaşaýyş üçin şahadatnamany resmileşdirip bilerler diýip, Zähmet ministrliginiň metbugat gullugy habar berdi.
Ýaşaýyş üçin şahadatnama 10 ýyl möhlet ýa-da daşary ýurtlynyň pasportynyň möhleti bilen berler.
Zähmet ministrliginiň “Daşary ýurtlular tarapyndan Gazagystan Respublikasynda hemişelik ýaşamaga ygtyýarnama almak üçin isleg bildirilýän hünärleriň sanawyny we ony resmileşdirmegiň düzgünlerini tassyklamak barada” buýrugy 2023-nji ýylyň 28-nji fewralyndan güýje girýär.

Isleg bildirilýän hünärleriň sanawy:

1. Neýrohirurg lukmany
2. Gematolog lukmany
3. Onkolog lukmany
4. Neonatolog lukmany
5. Endokrinolog lukmany
6. Organiki däl maddalaryň tehnologiýasy boýuna gözlegçi inžener
7. Organiki maddalaryň tehnologiýasy boýunça gözlegçi inžener
8. Farmasiýa tehnolog inženeri
9. Gazylyp alynýan peýdaly magdanlary taýýarlamak boýunça gözlegçi inžener
10. Awiasiýa inženeri
11. Kosmos ulgamynyň enjamlaýyn-programmalaýyn üpjünçiligi boýunça inžener
12. Täze tehnikany we tehnologiýany ornaşdyrmak boýunça inžener
13. Lazer enjamlary boýunça inžener
14. Sellýulozanyň, kagyzyň, poligrafiýanyň we süýümiň önümçilik tehnologýasy boýunça gözlegçi inžener
15. Lukmançylyk radiohimik inženeri
16. Lukmançylyk fizik inženeri
17. Dokma çig malynyň klassifikatory
18. Bakteriolog
19. IT infrastrukturasynyň arhitektory
20. Programma üpjünçiligi arhitektory
21. Önümçilik okuwynyň ussady (inženeriýa we inženerçilik işi)