Özbegistan Türkmenistandan mugt iberilýän suwuklandyrylan gazy mätäçlere paýlap başlady. Bu barada «Hududgaztaminot» kompaniýasynyň metbugat gullugyna salgylanyp, gazeta.uz habar berdi.
Suwuklandyrylan gazly demir ýol wagonlary eýýäm Özbegistana geldi. Ýangyç Garagalpagystanyň pes girdejili ýaşaýjylarynyň arasynda paýlanýar.
Kompaniýanyň metbugat gullugynyň belleýşi ýaly, Türkmenistan 2000 tonna suwuklandyrylan gaz iberdi. Onuň 1000 tonnasy Garagalpagystanyň ýaşaýjylarynyň arasynda, ýene 1000 tonnasy bolsa Horezm sebitinde paýlanmagy meýilleşdirilýär.
Özbegistanyň Energetika ministrligi ozal suwuklandyrylan gazyň mätäç maşgalalaryň arasynda mugt paýlanjakdygyny habar beripdi.
Fewral aýynyň başynda Türkmenistanyň Prezidenti Serdar Berdimuhamedow suwuklandyrylan gazy Özbegistana mugt geçirmek barada karara gol çekdi.
8-nji fewralda Özbegistan bilen Türkmenistanyň arasynda diplomatik gatnaşyklaryň ýola goýulmagynyň 30 ýyllygy mynasybetli Özbegistan Türkmenistana 20 sany Volkswagen Caddy tiz kömek ulagyny iberdi.
