Meta kompaniýasyna degişli bolan Facebook we Instagram sosial ulgamlarynda akkauntlaryň hakykylygyny tölegli tassyklamak mümkinçiligi peýda bolar. Bu barada kompaniýanyň ýolbaşçysy Mark Sukerberg habar berdi diýip, TASS belleýär.
“Şu hepde biz Meta Verified funksiýasyny – size akkauntyňyzy döwlet şahsyýetnamasy bilen tassyklamaga, gök nyşanjyga, özüni siz hökmünde görkezýän akkauntlardan goşmaça goraga eýe bolmaga we goldaw hyzmatyna gönüden-göni elýeterli bolmaga mümkinçilik berýän abuna hyzmatyny girizmäge başlaýarys” – diýip, Sukerberg Facebook-da ýazdy.
Sukerbergiň aýtmagyna görä, akkauntlary tassyklamagyň bahasy web-wersiýada aýda 11,99 dollar we iOS sistemasyndaky ykjam gurluşlar üçin aýda 14,99 dollar bolar. Täze funksiýany ulanmak mümkinçiligini ilkinji bolup Awstraliýanyň we Täze Zelandiýanyň ýaşaýjylary alar, soňra “ýakyn wagtda” ol beýleki ýurtlarda-da peýda bolar.
