Türkmenistanda Dominikan Respublikasynyň Adatdan daşary we Doly ygtyýarly ilçisi Elwis Antonio Alam Lora işe başlady. Ilçiden ynanç hatyny 20-nji fewralda Türkmenistanyň Mejlisiniň Başlygy G.Mämmedowa kabul etdi.
Dostlukly ýurduň doly ygtyýarly wekili Prezident Serdar Berdimuhamedowa Dominikan Respublikasynyň Prezidenti Luis Abinaderiň mähirli salamyny hem-de ykdysady ösüşiň ýoly bilen ynamly öňe barýan ähli türkmen halkyna iň gowy arzuwlaryny ýetirdi.
Duşuşygyň dowamynda ikitaraplaýyn, şeýle-de köptaraplaýyn görnüşde, ozaly bilen, iri halkara guramalaryň çäklerinde üstünlikli alnyp barylýan türkmen-dominikan hyzmatdaşlyk meseleleriniň giň toplumy boýunça düýpli pikir alyşmalar boldy.
Mejlisiň Başlygy özygtyýarly ösüş ýyllarynda Türkmenistanyň gazanan ägirt uly üstünlikleri barada gürrüň berdi. Diplomat milli parlamentiň düzümi we alyp barýan işleri, kanun çykaryjylyk ulgamynda geçirilýän düýpli özgertmeler bilen tanyşdyryldy.
