Bütindünýä bankynyň prezidenti Dewid Melpas möhletinden öň wezipesinden gitmek kararyna gelendigini mälim etdi.
Bütindünýä bankynyň metbugat beýanatyndan: "Bütindünýä bankynyň prezidenti Dewid Melpas direktorlar geňeşine dört ýyldan gowrak hyzmat edeninden soň, 30-njy iýunda tamamlanjak maliýe ýylynyň ahyryna çenli Bütindünýä bankynyň prezidenti wezipesinden gitmek niýetiniň bardygyny habar berdi".
Melpasyň bu kararynyň sebäbi entek aýan edilmedi. Melpasyň ygtyýarlyklarynyň möhleti entek 2024-nji ýylda tamamlanýardy.
Dewid Melpas Bütindünýä bankynyň 13-nji prezidenti. Ol bu wezipäni 2019-njy ýylyň 5-nji aprelinden bäri eýeleýär.
Düýbi Waşingtonda ýerleşýän Bütindünýä banky dürli ýurtlardaky döwlet we hususy kärhanalara, hökümetlerinden kepillikler bolan ýagdaýynda, uzak möhletli pes göterimli karzlary, şeýle hem göterimsiz karzlary we grantlary berýär.
