Ýaponiýanyň Toyota awtoulag korporasiýasynyň direktorlar geňeşiniň hormatly başlygy, kompaniýanyň esaslandyryjysynyň ogly Sýoitiro Toýoda sişenbe güni 97 ýaşynda aradan çykdy. Toyota-nyň habarynda aýdylyşyna görä, munuň sebäbi - ýürek ýetmezçiligi.
“Toyotanyň" dünýäde öňdebaryjy awtoulag öndürijileriniň birine öwrülmegine ýol açan kompaniýanyň hile gözegçilik ulgamyny hut Toýoda ornaşdyrdy diýlip hasaplanylýar. Onuň ýolbaşçylygynda premium Lexus brendini satuwa çykarmak we dünýäde ilkinji öndürilen gibrid ýeňil awtoulagyna öwrülen, kompaniýanyň esasy modellerinden biri bolan Prius-y öndürmek üçin möhüm kararlar kabul edildi.
1972-nji ýylda ol ýerine ýetiriji wise-prezident, 1981-nji ýylda bolsa satuwyň prezidenti boldy. 1982-nji ýylda Toyota-nyň satuw we önümçilik bölümleri birleşenden soň, birleşen guramanyň prezidenti boldy. 2009-njy ýylda ol pensiýa çykdy hem-de kompaniýanyň direktorlar geňeşiniň hormatly başlygy boldy we onuň ýerine uly ogly Akio Toýoda geldi.
Ýakynda habar berşimiz ýaly, 1-nji aprelden Akio Toýoda hem kompaniýanyň prezidenti wezipesinden aýrylar. Toyota Motor-yň täze prezidenti we baş ýerine ýetiriji direktory 53 ýaşly Kodzi Sato bolar. Ol Toyota-nyň operasion müdiri we Lexus International brendiniň prezidenti bolupdy.
