Sişenbe güni Şri-Lankanyň hökümeti biologik taýdan dargamaýan bir gezeklik plastik önümleri ulanmagy düýbünden gadagan etdi.
Daşky gurşawy goramak, şeýle hem adada ýaşaýan pilleri we ýabany sugunlary halas etmek maksady bilen şeýle çäre görülýär diýip, AFP habarlar gullugy hökümetiň resmi wekili, habarlar ministri Bandul Gunawardanyň sözlerini getirýär.
Onuň sözlerine görä, iýun aýyndan Şri-Lankada plastik önümleri öndürmek we satmak gadagan ediler. Bu çäreler ýurtda plastik paketleri ulanmazlyk babatda 2017-nji ýyldan bäri hereket edýän gadagançylygyň, şeýle hem bir gezek ulanylýan plastik gap-gaçlary we bu materialdan ýasalan çaga oýnawaçlaryny ýurda getirmezlik babatda 2021-nji ýylda girizilen gadagançylygyň üstüni ýetirer.
Ýerli daşky gurşawy goraýjylaryň pikiriçe, Şri-Lankadaky plastikden ýüz öwürmek çäresi, ekologiýa taýdan arassa materiallar ugrunda dünýä modasyna hormat däl-de, gyssagly zerurlykdyr. Ýurt her gün onlarça tonna plastik galyndy çykarýar. Zerur enjamlaryň ýoklugy sebäpli olar hiç hili gaýtadan işlenilmeýär. Plastik ýere gömülýär, soň bolsa daşky gurşawy zäherläp, ýabany haýwanlaryň ölmegine sebäp bolýan wagtyň haýal partlaýan minasyna öwrülýär.
