Beýik Britaniýada patyşa Karl III-iň portreti bolan ilkinji adaty poçta markalary hödürlendi. Royal Mail-iň habarynda markalar üçin teňňelerde ýerleşdirilen monarhyň keşbiniň ulanylandygy aýdylýar. Martin Jennings tarapyndan döredilen portret Karl III-iň çep profilini şekillendirýär, Ýelizaweta II-niň portreti bolsa markalarda we teňňelerde sag tarapa seredýärdi. Britaniýanyň däbine laýyklykda, teňňelerde her täze monarhyň ýüzi özünden öňkiniň seredýän tarapynyň garşysyna öwrülýär diýip, rbc.ru belleýär.
“Markalarda teňňelerden alnan şekiliň ulanylmagy 1840-njy ýylda “Gara penniniň” döredilen döwrüne degişli gadymy däbiň dowamydyr” – diýlip, Royal Mail-iň habarynda bellenilýär. “Gara penni” taryhda şa aýaly Wiktoriýanyň portreti bolan bir pens bahaly ilkinji poçta markasydyr.
Karl III-iň portreti dürli bahadaky poçta ýollamalaryny tölemek üçin niýetlenen dört reňkdäki adaty markalarda peýda bolar: gyrmyzy, ýaşyl, akwamarin we gara-ýaşyl. Ähli markalar deslapky sargyt üçin 3-nji martdan elýeterli bolar we 4-nji aprelde satuwa çykar.
Royal Mail-iň habarynda Ýelizaweta II-niň portreti bilen öň çykarylan markalaryň henizem poçtada ulanylyp bilinjekdigi bellenilýär.
Karl III-iň täç geýdirilme dabarasy 2023-nji ýylyň maý aýyna bellenildi, şonuň üçin onuň portreti bolan ilkinji markalar resmi taýdan britan tagtyna geçmezden ozal dolanyşykda peýda bolar.
