Ginnesiň rekordlar kitaby dünýädäki iň garry iti hasaba aldy – Bobi lakamly köpek 1-nji fewralda 30 ýyl we 266 gün ýaşyny doldurdy. Bu barada rbclife.ru habar berýär.
Bobi – portugal garawuly ýa-da portugal mastifi diýlip atlandyrylýan Rafeýru du Alentužu tohumynyň arassa ganly wekili. Öý mallaryny goramak üçin ösdürilip ýetirişdirilen şeýle itleriň ortaça ömür dowamlylygy 12-14 ýyla barabar.
Ol geçen asyryň birinji ýarymyndan bäri saklanan rekordy täzeledi. Öň, taryhda iň garry it 29 ýyl we 5 aý ýaşan (1910-1939) Blýui lakamly awstraliýa hileri hasaplanýardy. Täze rekord goýan itiň ýaşy Portugaliýanyň hökümeti tarapyndan ygtyýarlandyrylan SIAC weterinariýa guramasy tarapyndan tassyklandy.
Bobi 1992-nji ýylda Leýriýa okrugynda Jira atly itden dünýä inip, onuň dört güjüjeginiň biri boldy. Itiň häzirki eýesi Leonel Koşta Bobiniň uzak ýaşamagynyň esasy sebäpleriniň biri “uly şäherlerden uzakda parahat, asuda gurşaw” boldy diýip hasaplaýar. Mundan başga-da, Bobi tokaýlarda we oba hojalyk ýerlerinde erkin gezmäge mümkinçilik alyp, daňylgy saklanmady.
Koşta Bobiniň, esasan, öý naharyndan iýmitlenendigini belleýär. Saglyk ýagdaýy barada aýdylanda, Bobiniň onuň bilen bagly hiç hili kynçylygy bolmady diýen ýaly. Alada galmaga sebäp bolan ýeke-täk zat 2018-nji ýylda itiň dem almakda kynçylyk çekip, huşuny ýitirmegi boldy, ýöne ol diri galyp bildi. Indi it wagtal-wagtal weterinara görkezilýär.
