Awtoulag öndüriji Land Cruiser 70-i önümçilikden aýyrmagy meýilleşdirmeýär diýip, Toyota-nyň Awstraliýadaky wekiline salgylanýan CarsSales habar berýär. Üstesine, täze model çykarmak meýilnamasynyň bardygy hakynda hem maglumat bar.
Geljek ýyl «Land Cruiser 70» 40 ýyllyk ýubileýini bellär, bu mynasybetli täzelenen wnedorožnigi satyp başlamagy meýilleşdirýärler. LandCruiser 70 Series diňe bir çynlakaý päsgelçilikleri ýeňip geçmek bilen çäklenmän, Toyota-yň agyr ýükleri hem çekip bilýän iň köne we iň çynlakaý wnedorožnigidir.
Ilkinji gezek 1984-nji ýylda çykan 70-nji seriýa 2007-nji ýyldan bäri 200 seriýaly LandCruiser-de ulanylýan 4,5 litrlik goşa turbo görnüşli V8 dizel hereketlendirijisiniň has güýçli görnüşi bilen işleýär.
Täze awtoulag häzirki wersiýasyndan kän bir tapawutlanmaz: tegelek faralara, kesilen şekilli kuzowa we ullakan öň ganatlara eýe bolar. Ýöne içinde welin has köp üýtgeşiklik bolar: Land Cruiser 70-iň gibrid modifikasiýasynyň peýda bolmagy mümkin. Şeýle hem, wnedorožnik 2,8 litr göwrümli Land Cruiser Prado-dan “turbo dörtlügi” alyp biler. Her niçigem bolsa, güýç agregaty has ykjam we ekologiýa taýdan arassa bolmalydyr. Bu möhümdir, sebäbi model hatarynyň “ekoarassalygy” häzirki döwrüň esasy ugry.
Ýapon žurnallary täzeden janlandyrylan Land Cruiser 70-iň güýzde hödürlenjekdigini ýazdylar. Şeýle-de bolsa, täze ulagyň satuwy 2024-nji ýyldan bärde başlanmasa gerek.
