Toyota-daky seriýalaýyn awtoulaglaryň «zarýadly» görnüşlerine jogapkär Gazoo Racing toparynyň inženerleri «Prius» gibridiniň täze nesli üçin modifikasiýalaryň üstünde işleýärler. Bu hakda BestCarWeb ýazýar. Hetç gibridligine galsa gerek, ýöne kuwwaty ep-eslije güýçlener.
Nesliniň üýtgemegi bilen Toyota Prius öňem has kuwwatlanypdy. Iki litrlik hereketlendirijä esaslanan iň ýokary derejeli güýç gurluşy 223 at güýjüni berýär. (Toyota GR86-dan bary-ýogy 12 at güýji az) we 6,7 sekundyň içinde 100 km/sag tizlige çenli bat almaga mümkinçilik berýär.
Şeýle-de bolsa, Gazoo Racing-de hetçbeki has güýçlendirmegi göz öňünde tutýarlar. Şol bir wagtyň özünde, inženerler bar bolan gurluşy üýtgetmezler: deslapky maglumatlara görä, Prius GRMN RAV4 Prime-den gibrid priwod almagy mümkin. Krossowere oturdylýan atmosferaly 2,5 litrlik hereketlendiriji we iki sany elektromotor ikisi bilelikde jemi 306 at güýjüni ösdürýär. Şeýlelikde, täze Prius güýji boýunça GR Corolla hot-hetç bilen deňleşer.
Gazoo Racing-iň beýleki sport awtoulaglaryndan tapawutlylykda, geljekki täze ulagy mehaniki däl-de, awtomatiki korobka bilen enjamlaşdyrmak meýilleşdirilýär. Şeýle-de bolsa, Prius, beýleki sport awtoulaglary ýaly, has berk kuzow we berkidilen şassi alar. Mundan başga-da, gibridiň diňe bir içki görnüşi has sportlaşdyrylmak bilen çäklenmän, goşmaça komplektasiýasyny hasam giňeldip bilerler.
Neşiriň çeşmeleriniň berýän maglumatyna görä, şeýle bäş gapyly ulag 2023-nji ýylyň dördünji çärýeginde çykyp biler.
