2022-nji ýylyň IV çärýeginde Günorta Koreýanyň Samsung kompaniýasy arassa girdejisini 2,2 esse ýokarlandyrdy, emma ýat çipleriniň we smartfonlaryň bölümçelerinde islegiň peselmegi sebäpli operasion girdeji 3,2 esse azaldy. Oktýabr-dekabr aýlarynda kompaniýanyň arassa girdejisi 23,84 trln Günorta Koreýa wonasyna (takmynan, $19,4 mlrd), operasion girdeji 4,31 trln wona barabar boldy. Bu barada Interfax.ru habar berýär.
Hasabat döwründe Samsung-yň girdejisi, takmynan, 8%, 70,5 trln wona çenli azaldy. Kompaniýanyň ýarym geçirijileri öndüriji bölümçesiniň girdejisi 20,07 trln wona, operasion girdejisi 270 mlrd wona boldy. Displeýleri öndürmek boýunça biznes 9,31 trln wona möçberinde çärýek girdejisini, 1,82 trln wona möçberinde operasion girdejini hasaba aldy. IT we ykjam aragatnaşyk bölümçesi 26,9 trln wona möçberinde girdeji, 1,7 trln wona möçberinde operasion girdeji aldy.
Telewizor önümçiligini öz içine alýan sarp ediji elektronikasy bölümçesiniň girdejisi 15,58 trln wona, operasion ýitgi 60 mlrd wona boldy.
2022-nji ýylyň jemi boýunça Samsung arassa girdejisini 39,5%, 55,6 trln wona çenli ýokarlandyrdy, girdeji 8% artyp, 302,2 trln wona ýetdi. Operasion girdeji 43,38 trln wona boldy.
Kompaniýa 2023-nji ýylyň ikinji ýarymyndan islegiň gaýtadan dikeldilip başlanmagyna garaşýar, ýöne makroykdysady näbellilik saklanar.
Sişenbe güni söwdanyň jemi boýunça kompaniýanyň paýnamalary 3,5% azaldy. Soňky 12 aýda onuň kapitallaşdyrmasy 16,6% azaldy.
