Tailandyň 76 welaýatynyň her birinde daşary ýurtly syýahatçylar üçin azyndan bir sany koronawirusa garşy sanjym merkezi açylar. “Taý pi-bi-es” teleýaýlymynyň habar bermegine görä, daşary ýurtlular üçin meýletin immunizasiýa tölegli bolup, patyşalygyň raýatlary üçin saklanýan sanjym ätiýaçlyklaryna täsir etmez diýip, bigasia.ru belleýär.
Şonuň bilen birlikde uzak möhletleýin wizalary bolan daşary ýurtlular, diplomatik korpusyň işgärleri, şeýle-de olaryň maşgala agzalary koronawirusa garşy sanjymy mugt alyp bilýärler. Daşary ýurtly syýahatçylar üçin immunizasiýa hyzmaty 18-nji ýanwarda Bangkokyň käbir ýerlerinde, şeýle-de Songkhla, Çiangmaý we Çonburi welaýatlarynda teklip edildi. AstraZeneca serişdesi bilen sanjym almagyň bahasy bir doza üçin 800 bat (24 dollar), Pfizer – 1000 bat (30 dollar). Mundan başga-da, müşderiler 380 bat (11 dollar) möçberinde hyzmat tölegini hem tölemeli bolar.
Tailandda koronawirus bilen kesellemegiň ilkinji hadysasy 2020-nji ýylyň 13-nji ýanwarynda ýüze çykaryldy. Ýurduň uly ýaşly ilatynyň mugt köpçülikleýin immunizasiýasy 2021-nji ýylyň fewral aýynda başlady, soňra ol 12 – 18 ýaşlylar üçin hem degişli edildi. 2022-nji ýylyň 1-nji oktýabrynda kowid pandemiýasy sebäpli girizilen patyşalyga giriş üçin çäklendirmeler we adatdan daşary ýagdaý režimi ýatyryldy.
