Hytaýyň ýaşaýjylary ýekşenbe güni Aý senenamasy boýunça gara suw towşanynyň howandarlygynda geçjek Täze ýylyň gelmegini baýram edip bellediler. Bu barada TASS agentligi habar berýär.
Geçen ýylyň dekabr aýynda ýerli häkimiýetler tarapyndan ýurtda hereket etmäge degişli kowid çäklendirmeleri hem-de serhet gadaganlyklary ýatyrylandan soň, HHR-iň ýaşaýjylary COVID-19 pandemiýasy başlaly bäri ilkinji gezek Täze ýyly erkin aýlanyp belläp bilýärler. HHR-iň Immigrasiýa işleri boýunça döwlet edarasynyň habar berşi ýaly, Täze ýyl mynasybetli dynç alyş möwsüminde Hytaýyň çägine gelýänleriň we gidýänleriň sany, takmynan, 600 müň bolar, bu bir ýyl ozalky degişli döwürdäki giriş-çykyşlaryň sanyndan tas iki esse köpdür.
Hytaýda ýetip gelen baýram mynasybetli dynç alyş günleri üçin käbir restoranlar, banklar, dükanlar we döwlet edaralary ýapyldy. Diňe polisiýa, ýangyn we beýleki gyssagly kömek gulluklary işleýär.
Bu ýyl Pekiniň administrasiýasy howpsuzlyk çäreleri bilen baglylykda Täze ýyl üçin adaty bolan feýerwerkleri ulanmagy gadagan etdi. Muny häkimiýetler tarapyndan paýtagtda ýaşaýan öýjükli aragatnaşyk abonentleriniň telefon belgilerine ýollanan SMS habarlary hem-de şäherde ýaýradylan kagyz habarnamalary delillendirýär.
Aý senenamasy boýunça Täze ýyl 21-nji ýanwardan 22-nji ýanwara geçilýän gije başlady we 2024-nji ýylyň 10-njy fewralyna çenli dowam eder. Onuň howandary suw towşany bolup, esasy reňkleri gara we gökdür. Hytaý ýaşaýjylary üçin Çunsze Aý senenamasy boýunça bellenilýän esasy baýramçylyklaryň biridir.
