Hytaý dünýäde ilkinji doly awtomatlaşdyrylan ylmy-barlag gämisini ulanylyşa girizdi. Bu barada Hytaýyň Merkezi telewideniýesi CCTV-ä salgylanyp, TASS habar berýär.
“Çžuhaýýun” gämisi awtonom nawigasiýa ulgamy hem-de uzak aralykdan dolandyryş tehnologiýasy bilen enjamlaşdyryldy. Onuň energetiki we hereketlendiriji gurluşy ýaly esasy ulgamlarynyň ählisini Hytaý özbaşdak işläp düzdi diýlip, materialda görkezilýär.
Gäminiň uzynlygy 88,5 metr, ini 14 metr we bortunyň beýikligi 6,1 metr. Agramy bilen 2,1 müň tonna suwy gysyp çykarýan gäminiň iň ýokary tizligi 18 uzele barabar. Tygşytly režimde tizlik 13 uzele deň.
Gämi ummany öwreniş, okeanografiki surata düşüriş, kartografiýa, deňiz patrullary we nusga alyş boýunça toplumlaýyn işleri ýerine ýetirmek üçin ulanylyp bilner. Onuň bortunda howa we deňiz giňişliklerine, şeýle-de çuňluklara gözegçilik etmek üçin dürli enjamlary gurnamak mümkinçiligi hem göz öňünde tutulandyr.
