Hindistanyň we Bangladeşiň derýalary arkaly uzaklygy 3,2 müň km bolan gämi syýahaty Gangyň kenarynda ýerleşýän Waranasi şäherinde başlady. “The Pioneer” gazetiniň habar bermegine görä, dünýädäki iň uzak derýa syýahatynyň açylyş dabarasyna Hindistanyň premýer-ministri Narendra Modi wideoaragatnaşyk arkaly gatnaşdy diýip, bigasia.ru belleýär.
“Hindistanyň bäş ştatynyň üsti bilen dünýädäki iň uzak derýa gezelenjiniň başlamagy respublikada syýahatçylygyň täze eýýamyny alamatlandyrdy” – diýip, hökümet baştutany belledi.
Gangyň we Hindistanyň hem Bangladeşiň 27 derýasynyň üsti bilen üç palubaly MV Ganga Vilas gämisinde Şweýsariýadan 33 syýahatçy syýahata ugrady. Gezelenç 51 gün dowam edip, Assam ştatynyň Dibrugarh şäherinde tamamlanar.
Gezelenç ugry syýahatçylary Hindistanyň baý medeni we taryhy mirasy bilen tanyşdyrmak üçin işlenip düzüldi. Maksatnama 50 sany syýahatçylyk merkezine, şol sanda BMG-niň Bütindünýä medeni mirasynyň obýektlerine, milli seýilgählere we Patna, Sahiganj, Kalkutta, Guwahati we Dakka ýaly uly şäherlere baryp görmeklik girizildi.
