ABŞ-nyň Iýmit önümleriniň we derman serişdeleriniň hiline gözegçilik edarasy (FDA) Alsgeýmer keseline garşy Ýaponiýanyň Eisai farmasewtik firmasy we onuň amerikan hyzmatdaşy Biogen kompaniýasy bilen bilelikde işlenip düzülen täze serişdäni tassyklady. Bu barada nhk.or.jp saýty habar berýär.
Edara Lekanemab serişdesiniň netijeliligi tassyklanandan soň ony ulanmaga rugsat berendigini mälim etdi. Hünärmenler 850-ä golaý hassanyň gatnaşmagynda geçirilen barlagyň dowamynda dermanyň täsirine baha berdiler. Netijeler Alsgeýmer keseliniň alamaty bolan beta-amiloid emele gelmeleriň azalýandygyny görkezýär.
Lekanemab ABŞ-da tassyklanan Alsgeýmer keseline garşy beta-amiloidlere gönükdirilen ikinji derman serişdesi boldy. Lekanemab keseliň ösüşini haýalladyp, kelle beýnisiniň öýjükleriniň ýok bolmagynyň öňüni alýar.
