Amerikaly režissýor “20 Minutlyk” fransuz teleýaýlymyna interwýu berdi we “Awatar” ylmy-fantastik franşizasynyň soňky bölümleriniň tutuş film seriýasynda iň gowusy boljakdygyny boýun aldy. Kinematografyň pikiriçe, ilkinji lentalar diňe "giriş" boldy.
“Biz baş gahrymanlaryň gatnaşýan wakalaryny dowam etdirmek bilen täze dünýäleri öwreneris. Soňky bölümleriň iň gowusy boljakdygyny aýdyp bilerin. Lentalaryň galan bölegi «esasy tagamy saçaga äbermek üçin taýýarlamak ýaly bir giriş» boldy diýseňem boljak. Elbetde, bu entegem adamlaryň “Awatar 2”-ni nähili kabul etjeklerine, filmiň öz tomaşaçylaryny tapjagyna-tapmajagyna bagly bolar”-diýip Kemeron belledi.
Mundan başga-da, filmi goýujy täze bölümlerde öňkülerden tapawutly täze adamlary tanatmagy meýilleşdirýändigini aýtdy. “Mysal üçin, kül reňk adamlar oduň güýjüni görkezerler. Na'wi urugyny başga tarapdan görkezmek isleýärin, sebäbi häzirki wagtda men olary diňe gowy tarapdan görkezdim. Ilkinji filmlerde gaty ýaramaz adam keşplerini we Na'vi ýaly oňyn gahrymanlary görmek bolýardy. “Awatar 3-de” muny tersini ederis "- diýdi Kemeron.
Ýakynda çykan franşizanyň ikinji bölümi tomaşaçylaryň göwnünden turdy we premýeranyň başlanan gününden 12 günüň içinde dünýäde 1 milliard dollardan gowrak girdeji gazandy. Şeýle hem bu film 2022-nji ýylda iň köp girdeji gazananlaryň sanawyndaky üçünji film we COVID-19 pandemiýasy döwründe iň köp girdeji gazananlaryň sanawynda dördünji film boldy. Geçen ýyl “Top Gun: Mewerik” we “Ýura eýýamynyň dünýäsi: Agalyk” filmleri hem 1 milliard dollardan gowrak pul toplamagy başardy.
