Halkara Futbol Federasiýasynyň (FIFA) ýolbaşçysy Janni Infantino dünýäniň ähli ýurtlaryny iň bolmanda bir stadiony üç gezek dünýä çempiony Peläniň hormatyna atlandyrmaga çagyrdy. Bu barada Infantino San-Paulu ştatynyň Santos şäherindäki adybir klubuň stadionynda geçirilen Pele bilen hoşlaşyk dabarasynda aýtdy. Muny RIA Nowosti ýetirýär.
“Men köp duýgulary başdan geçirýärin: men gynanýaryn, ýöne ýylgyrýaryn, sebäbi Pele bize köp ýylgyryş berdi. Biz FIFA-da futboluň şasyny hormatlaýarys we tutuş dünýäden hem bir minut dymyşlyk bilen oňa hormat goýmagy haýyş edýäris. Mundan başga-da, biz çagalarymyzyň Peläniň näderejede möhümdigini bilmekleri üçin dünýäniň ähli ýurtlaryny iň bolmanda bir stadiony onuň hormatyna atlandyrmaga çagyrmak isleýäris” – diýip, “Globo” Infantinonyň sözlerini getirýär.
Ýatlap geçsek, Pele 29-njy dekabrda aradan çykdy. Ol taryhda oýunçy hökmünde üç gezek dünýä çempiony bolan ýeke-täk futbolçydyr. Ol 92 oýunda 77 gol geçirmek bilen, Braziliýanyň milli ýygyndysynyň taryhynda iň gowy bombardirleriň sanawynda birinji orny Neýmar bilen paýlaşýar. Pele professional karýerasynda geçiren gollarynyň sany boýunça Ginnesiň rekordlar kitabyna girýär.
