Braziliýanyň ýygyndysynyň öňki hüjümçisi, üç gezek dünýäniň çempiony bolan Pele milli toparyň janköýerlerine we oýunçylaryna ýüzlendi.
"Durmuş — bu mümkinçilik. Ony näme etmelidigi siziň her biriňiziň özüňize bagly. Biz muňa dogry düşündik we biz muňa nädogry düşündik. Ýeňiş bize baýram bolup gelýär. Ýeňlişden - öwrenýäs. Durmuş hemişe jomart we bize täze başlangyçlary hödürleýär. Gün-günden täze ýola düşýäs. Bu döwürde biz ýol ugrumyzdaky böwetlere garamazdan, hiç haçan ölmejek arzuwlara atlanýas.
Bu hemmä degişli, ýöne siz futbolçy bolmagy arzuwlanyňyzda , mümkinçilik has az, arzuwlar bolsa juda alysda görünýär. Şowsuzlygyň awusy durmuşyň beýleki agyry-ynjylaryndan agdyk däl. Ýöne olary ýazgarýan adam köp ýaly, şeýle dälmi? Onsoňam, dogrusyny aýtsaň, ýeňişler has ýygy-ýygydan bellenilýär.
Dünýä çempionatyndan çykarylanymyz näçe agyr degýänem bolsa, döşümizdäki ilkinji bäş ýyldyza nähili ýetenimizi ýatlaryna salmaklaryny braziliýalylardan haýyş edesim gelýär. Bizi herekete getirýän - söýgi. Bilmedim, futboly nämeden beýle gowy görýäs. Bu - sportdaky hakyky dostluga, ýeňşiň tolgunçly gykylygyna ýa-da oýun bary-ýogy 90 minut dowam edýänem bolsa, sähel salymlyk ähli aladalarymyzyň unudylmagyna söýgi. Belki-de, şeýle uly ýurduň aglaba toparlarynda barlygy duýulýan ýoksullyga, açlyga we neşekeşlige garşy göreşe söýgüdir. Iň owadan sportuň bir topar artykmaçlygy bar. Aýratynam, bu ýerde - Braziliýada.
Sebäbiniň nämediginiň ähmiýeti ýok. Möhüm zat - biziň bitewilige teşne wagtymyz topar biziň başymyzy birikdirdi. Men biziň öz aramyzdaky we ýurdumyz bilen aramyzdaky duýgynyň geldi-geçer bolmazlygyny arzuw edýän. Bu maksadyň elýetmez görünýän bolmagy mümkin. Emma oglanjyk wagtym şeýle görünýän başga bir arzuwym bardy: dünýä çempionatynda kakam üçin ýeňiş gazanmak.
Arzuw hakynda aýdylanda, biziň türgenlerimiziň arzuwy gutarandyr öýtmäň. Olaryň barynyň, oglankam edil meň arzuw edişim ýaly, altynjy ýyldyzyň arzuwyny edýändiklerini bilýän. Biziň ýeňşimiz biraz soňa süýşdi.
Men türgen dostlaryma we ýygyndynyň tehniki komitetine özümiň haýran galmamy, raýdaşlygymy we söýgimi galdyrýaryn. Ähli braziliýalylara sportda bizi baglanyşdyrýan jebisligimiziň we söýgimiziň ömürlik bolmagyny arzuw edýärin. Arzuw biziň hemmämiziňki. Söýgi, söýgi we söýgi" - diýip, Pele sosial torlarda ýazdy.
