Özbegistan gyş möwsüminde içerki isleglerini kanagatlandyrmak üçin Türkmenistandan 1,5 milliard kub metr tebigy gazy import eder diýip, sişenbe güni Özbegistanyň Ministrler Kabinetiniň Ýangyç-energetika toplumy departamentiniň wekili RIA Nowosti agentligine mälim etdi.
Geçen hepde Özbegistanyň hökümeti ýurtda howanyň sowamagy bilen bagly energiýa gorlarynyň ýetmezçiligi sebäpli gazyň, elektrik energiýasynyň, kömrüň we mazutyň importyny işjeňleşdirmek barada karar kabul etdi.
Biraz soňrak «Uztransgaz» PJ-niň müdirliginiň başlygy Behzot Narmatow içerki islegiň ösmegi sebäpli Özbegistanyň gazy eksport etmegini doly bes edendigini belledi.
«Türkmenistan gyş möwsüminde Özbegistana 1,5 milliard kub metre çenli gaz iberer» diýip, agentligiň söhbetdeşi habar berdi.
Gaz ibermek hakyndaky ylalaşyk golaýda Özbegistanyň Prezidentiniň Diwanynyň ýolbaşçysy Sardor Umurzakow bilen Türkmenistanyň Prezidenti Serdar Berdimuhamedowyň Aşgabatda geçiren gepleşikleriniň jemi boýunça gazanyldy.
«Bu üpjünçilik gyşyna Özbegistanda gaza bolan ýokary islegi kanagatlandyrmaga mümkinçilik berer» — diýip, departamentiň wekili sözüniň üstüni ýetirdi.
Owal Özbegistanyň Energetika ministrliginiň metbugat gullugy içerki islegiň ösmegi bilen bagly respublikanyň Türkmenistandan elektrik energiýasyny import etmegi artdyrandygyny habar beripdi: gije-gündiziň dowamynda 17-18 million kWt/sag-dan başlap 20-21 million kWt/sag-a çenli.
