Täze Zelandiýanyň parlamenti 2009-njy ýylyň 1-nji ýanwarynda ýa-da ondan soň doglan ähli raýatlara temmäki önümlerini satmagy gadagan edýän kanuny kabul etdi. Bu barada The Guardian neşiri habar berýär.
Neşir bu ýurt şeýle kanuny kabul eden ilkinji ýurtdur diýip belleýär.
Şunlukda çilim almak üçin iň bäribaş ýaş hemişe ýokarlanyp gider, hatda ýene 50 ýyldan çilim satyn aljaklara-da azyndan 63 ýaşandygyny tassyklaýan şahadatnama gerek bolar diýip, Time neşiri ýazýar.
Täze gadaganlyk bilen bir hatarda temmäki ulanmagy kemmäge çagyrýan beýleki düzgünnamalar hem güýje girer. Şeýlelikde, temmäki önümlerinde nikotiniň mukdaryny birbada kemeltmek meýilleşdirilýär, çilimler bolsa ýöriteleşdirilen dükanlarda satylyp başlanar. Temmäki dükanlarynyň umumy sany on esse - 6000-den 600-e çenli azalar.
The Guardian-yň maglumatlaryna esaslansaň, Täze Zelandiýada 2022-nji ýylyň noýabryndaky ýagdaýa görä, her gün çilim çekýän adamlaryň sany, geçen ýylky 9,4% bilen deňeşdirilende, 8%-e çenli azaldy, bu edilen gözegçilikleriň taryhynda iň az görkeziji boldy. Şol bir wagtda, neşiriň görkezişi ýaly, weýp (elektron çilim) çekýänleriň sany 6,2%-den 8,3%-e çenli artdy.
Täze Zelandiýanyň hökümeti 2025-nji ýyla çenli ýurdy "temmäkiden azat" ýurda öwürmäge çalyşýar.
