Fransiýa çärýek finalda Angliýadan üstün çykyp, Katarda dowam edýän futbol boýunça dünýä çempionatynyň ýarym finalyna çykdy.
El-Haurda geçirilen duşuşyk 2:1 hasabynda tamamlandy. Fransuzlardan gollary Orelýen Tçuameni (17-nji minut) we Oliwýe Žiru (78) geçirdi. 52-nji minutda Tçuameni öz jerime meýdançasynda düzgüni bozdy, netijede iňlislerden Harri Keýn 11 metrlik urgudan ýeke-täk goly geçirdi. Keýn 84-nji minutda toparynyň gazanan 11 metrlik urgusyny dürs ýerine ýetirip bilmedi.
Keýn milli ýygyndysy üçin geçiren gollarynyň sany boýunça Ueýn Runiniň rekordyny gaýtalady (hersinde 53 gol).
Ýarym finalda çempionatyň häzirki çempionlary bolan fransuzlar Marokko bilen duşuşarlar, oýun 14-nji dekabrda geçiriler. Ikinji ýarym final duşuşygy 13-nji dekabrda Argentina bilen Horwatiýanyň arasynda geçiriler.
