Türkmenistan Halkara gatnawlarda konteýnerleri konteýner otlularynyň düzüminde daşamak hakyndaky ylalaşyga goşulmagy meýilleşdirýär. Bu barada Ministrler kabinetiniň ýanyndaky Ulag we kommunikasiýalar agentliginiň baş direktory M.Çakyýew Hökümet mejlisinde habar berdi.
Onuň sözlerine görä, "Türkmendemirýollary" agentligi tarapyndan öz gurluş bölünmesini - açyk görnüşli "Demirýollary" paýdarlar jemgyýetini, Türkmenistanyň üstünden geçýän halkara ulag geçelgesini ösdürmek, ýurduň çäginden konteýnerläp daşaýyşlaryň möçberini artdyrmak, şeýle hem optimal baha konýunkturasyny we logistiki çyzgyny kemala getirmek maksady bilen, agzalan ylalaşyga birikdirmegiň mümkinçilikleri öwrenildi.
Demir ýollaryň hyzmatdaşlygy guramasynyň platformasynda kabul edilen agzalan ylalaşyk, 2022-nji ýylyň 11-nji sentýabryndaky ýagdaý boýunça üýtgetmeleri we goşmaçalary nazara almak bilen, 2022-nji ýylyň 1-nji ýanwaryndan bäri hereket edýär.
