Türkmenistan bilen Russiýa demir ýol infrastrukturasyny ösdürmegiň üstünde işleýärler, rus kompaniýalarynyň bolsa türkmen demir ýollary pudagyny döwrebaplaşdyrmaga gatnaşmak üçin uly geljegi bar - diýip, Russiýa Federasiýasynyň Türkmenistandaky söwda wekili Aleksandr Ýelizarow TASS-yň habarçysy bilen gürrüňdeşlikde aýtdy.
Şeýle-de, ol ýakyn wagtlarda Russiýanyň demir ýollarynyň hünärmenleriniň wekiliýetiniň ýurda geljekdigini, türkmen demir ýollarynyň durkuny täzelemek boýunça geçirilmeli zerur işlere baha berjekdigini, şeýle-de, Türkmenistanyň ägirt üstaşyr kuwwaty bolan demir ýol hojalygynyň goýberiş ukybynyň mümkinçiliklerini öwrenjekdigini habar berdi.
Ýük akymy artanda bar bolan ýol hojalygyny döwrebaplaşdyrmak we täzesini gurmak, häzirki zaman ammar infrastrukturasyny, şol sanda ýapyk we sowadyjy jaýlary gurmak zerur bolar. Beýleki uzakmöhletleýin taslamalaryň içinde türkmen demir ýol magistrallaryny elektrifikasiýalaşdyrmak we uglewodorod ýangyjyny ulanmakdan daşlaşmaklyk ýaly işler bar diýip, rus söwda wekili aýtdy.
Ýene bir artykmaçlyga eýe ugur, ol hem tehnika bilen üpjün etmek örüsindäki hyzmatdaşlyk. Ýaňy-ýakynda Türkmenistana "Transmaşholding" rus paýdarlar jemgyýetiniň bäş teplowozy gelip gowuşdy. Ýelizarowyň sözlerine görä, Söwda wekilhanasy eýýäm rus kompaniýasy bilen bilelikde indiki taslamanyň üstünde iş alyp barýar.
