Katarda dünýä çempionaty - 2022-niň toparlaýyn tapgyrynyň üçünji duşuşygynda Argentina Polşadan üstün çykdy.
Dohada geçirilen duşuşyk 2:0 hasabynda tamamlandy. Gollary Aleksis MakAlister (46-njy minut) we Ýulian Alwarez (67) geçirdi.
39-njy minutda Lionel Messiniň 11 metrlik jerime urgusyny Woýseh Şensny gaýtardy.
Ugurdaş duşuşykda Lusailde Meksikanyň ýygyndysy Saud Arabystany bilen 2:1 oýnady. Meksikadan gollary Enri Martin (47-nji minut) we Luis Çawes (52) geçirdi, Saud Arabystanyndan Salem al-Dawsari (90+5) tapawutlandy.
Meksikanyň goşmaça wagtda geçirden goly ony pleý-off tapgyryndan mahrum etdi. Polşa geçiren-geçirden gol sany boýunça Meksikadan öňe geçdi.
Argentina 6 utuk bilen C topardan birinji bolup çykdy, Polşa (4) ikinji, Meksika (4) üçünji, Saud Arabystany (3) dördünji.
1/8 final tapgyrynda Argentina 3-nji dekabrda Awstraliýa bilen, Polşa 4-nji dekabrda Fransiýa bilen duşuşar.
