Apple kompaniýasynyň Hytaýyň Çžençžou şäherindäki zawodynda bolup geçýän nägilelikler 2022-nji ýylda 6 mln iPhone Pro-nyň kem bolmagyna getirer. Bu barada Bloomberg agentligine salgylanyp, incrussia.ru habar berýär.
Habar berlişi ýaly, Foxconn zawodyndaky ýagdaýy durnuklaşdyrmak heniz başardanok, şonuň üçin ýitgi hasaby üýtgäp biler. Köp zat fabrikany dolandyryjy taýwan kompaniýasynyň adamlary gurnama konweýerlerine gaýdyp gelmäge ynandyryp biljekdigine baglydyr.
Foxconn zawodyndaky köpçülikleýin nägilelikler 23-nji noýabrda başlandy. Işgärler kärhanada girizilen berk koronawirus çäklendirmelerine garşy çykdylar. Netijede, Foxconn ähli isleg bildirýänlere 1,4 müň dollar kompensasiýa bilen işden çykmagy teklip etdi.
Reuters agentliginiň maglumatlaryna görä, 20 müňden gowrak adam zawody terk etdi. Onda jemi 200 müň işgär işleýär. Soňrak Foxconn zawodda dekabr-ýanwar aýlarynda galýan işgärlere 1,8 müň dollar möçberinde goşmaça bonus teklip etdi.
Çžençžoudaky zawod Apple kompaniýasynyň 2022-nji ýylda has islegli bolan iPhone 14 Pro we Pro Max smartfonlarynyň aglabasyny öndürýär. Bu smartfonlar esasy iPhone 14 modeline islegiň gaçmagynyň öwezini doldular.
