Saud Arabystanynyň ýaşaýjysy Abdalla al-Salmi futbol boýunça dünýä çempionatyny görmek arzuwyna ýetmegiň hatyrasyna pyýadalap 1600 km ýol geçdi. Ol dogduk şäheri Jiddadan çykyp, Kataryň paýtagty Doha çenli aralygy ýöräp geçipdir diýip, BBC News agentligi habar berýär. Ýaýlymyň žurnalistleriniň berýän maglumatyna görä, Abdalla al-Salmi 55 günläp ýöräpdir. Janköýeriň özi bu syýahatyň özüne ýeňil düşmändigini, ýöne köseneniňe degýändigini gürrüň berýär.
«Men mydama şu çempionaty görmegiň arzuwyndadym, ýöne her gezek gidip bilmän galýardym, sebäbi ol örän uzakda, bir görseň GAR-da, bir görseň Braziliýada, bir görseňem Russiýada geçýärdi. Ýöne men arap bolup, arap ýurdunda geçýän birinji dünýä çempionatyny göräýmelidim, bu meniň üçin uly buýsanç» — diýip, janköýer Abdalla al-Salmi BBC bilen gürrüňdeşlikde pikir-duýgularyny paýlaşdy.
Al-Salmi bu syýahatyň diňe bir kyn bolman, hatda wagtal-wagtal howply hem bolandygyny gürrüň berýär. Ysgyndan gaçyrýan epgege çydap, gum alaňlaryny aşmaly we ýabany haýwanlardan goranmaly bolandygyny aýdýar: «Käte golaýymda özüm bilen deň ýöräp barýan möjegi görýärdim». Çempionata pyýadalap barmagy Abdallany Doha meşhur etdi. Indi ony köçede-de tanap, adamlar meşhur adam hökmünde ondan özleri bilen surata düşmegini haýyş edýärler.
Al-Salminiň bu yhlasy ýerine düşdi diýsegem bolsa, çünki 22-nji noýabrda Saud Arabystanynyň ýygyndysy toparlaýyn tapgyryň birinji oýnunda güýçli hasaplanýan Argentinany 2:1 hasabynda ýeňmegi başardy.
