Gyrgyzystanyň paýtagty Bişkek şäherinde geçirilen sambo boýunça dünýä çempionatynyň jemleýji gününde —13-nji noýabrda türkmen samboçylary 1 kümüş we 2 sany bürünç medal gazandylar. Bu barada Halkara sambo federasiýasynyň saýtynda habar berilýär.
Hususan-da, Begenç Baltaýew (79 kg agrama çenli) kümüş medala, Guwanç Begalyýew (98 kg agrama çenli) bürünç medala we Babajan Ibadullaýew (98+ kg agram derejesinde) bürünç medala mynasyp boldy.
Belläp geçsek, sambo boýunça dünýä çempionatynyň birinji gününde türkmen türgeni Muhammet Kössekow 64 kg agram derejesinde altyn medala mynasyp boldy. Ýaryşyň ikinji gününde Türkmenistanyň milli ýygyndysy bürünç medallarynyň ikisini gazandylar. Bu medallara Türkmenistanyň söweş sungaty Milli federasiýasynyň türgeni Kakageldi Ýegenbaýew (71 kilograma çenli) we ýurdumyzyň Bedenterbiýe we sport baradaky döwlet komitetiniň sport mekdebiniň tälimçisi Batyr Hojamuhammedow (98 kg-dan gowrak) mynasyp bolmaga başardylar.
Umumylykda, Türkmenistanyň milli ýygyndysy sambo boýunça dünýä çempionatynda 1 sany altyn, 1 sany kümüş, we 4 sany bürünç medal gazandylar.
