Türki döwletleriň guramasynda 2023-nji ýyl “Türki siwilizasiýanyň ösüş ýyly” diýlip yglan edildi. Bu barada Samarkantda geçirilen TDG-niň sammitinde Özbegistanyň prezidenti Şawkat Mirziýoýew aýtdy diýip, forbes.kz belleýär.
Özbegistanyň lideri gurama gatnaşyjy döwletleriň gadymy türki siwilizasiýanyň bahasyna ýetip bolmajak mirasyny gorap saklamagyň, öwrenmegiň we nesillere geçirmegiň möhümdigini nygtady.
“Türki dünýäsiniň haýran galdyryjy beýik taryhy, beýik ata-babalary we hiç zat bilen deňeşdirip bolmajak baýlygy bar. Men türki dünýäsine beýik geljegiň garaşýandygyna ynanýaryn. Biz bu geljegi zähmetsöýer, ak ýürekli we pähimli halkymyz bilen bilelikde gurarys” – diýip, Şawkat Mirziýoýew aýtdy.
Ol gadymy şäher Samarkantda geçirilen sammitiň häzirkizaman taryhynda türki dünýäsiniň siwilizasiýasynyň ösüşinde täze tapgyryň başlangyjy boljakdygyny belledi.
“Men Guramamyzda 2023-nji ýyly Türki siwilizasiýanyň ösüş ýyly diýip yglan etmek baradaky teklibiň goldanandygy üçin minnetdarlyk bildirýärin” – diýip, Şawkat Mirziýoýew sözüni jemledi.
