2003-nji ýylda «Formula-1» klasly ulag ýaryşlary boýunça dünýä çempiony bolan nemes türgeni Mihael Şumaheriň Ferrari toparynyň bolidi Sotheby's auksionynda 14,6 mln dollar bahadan satyldy diýip, Forbes habar berýär.
Bu «Patyşalyk çapyşyklarynyň» awtoulagynyň söwdasynyň tutuş taryhynda rekord bahadyr. Geçen gezekki rekordam Şumaheriň ulagyna degişli bolupdy, nemes türgeni şol ulagda 2001-nji ýylda «Patyşalyk çapyşyklarynyň» çempionatynda ýeňiş gazanypdy. Ol 2017-nji ýylda 7,5 mln dollara satylypdy.
Mihael Şumaher — «Formula-1»-iň ýedi gezek çempiony. 2003-nji ýylda ol alty tapgyrda utup, altynjy gezek tituly gazanypdy. Ol şol döwür McLaren üçin çykyş edýän fin çapyjysy Kimi Raýkkonenden bary-ýogy iki utuk ozdurypdy. Şumaher 2003-nji ýylyň dekabrynda fransuz Alplarynda dag lyžasynda typyp ýörkä agyr kelle çanak-beýni şikesini aldy. Ol eňňitden gaçyp, kellesi daşa degdi. Türgen ýarym ýyl Grenobl şäheriniň hassahanasynda medikamentoz komada ýatdy. 2014-nji ýylyň iýunynda «Formula-1»-iň rekordsmeny komadan çykyp, saglygy dikeldiş merkezine geçirildi. 2014-nji ýylyň sentýabryndan bäri ol Şweýsariýadaky öýünde bejergi almagyny dowam edýär. Şumaheriň maşgalasyndakylar we töweregindäki adamlar onuň ýagdaýy barada örän seýrek gürrüň berýärler, saglygynyň tiz wagtda dikeljegine ynamyň ýokdugyny aýdýarlar.
