Şu gün Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedow Türki Döwletleriň Guramasynyň döwlet Baştutanlarynyň Geňeşiniň mejlisine gatnaşmak üçin, iş sapary bilen Özbegistan Respublikasynyň Samarkant şäherine bardy.
«Türkmenistan» gazetiniň elektron neşiriniň habar berşi ýaly, Samarkant şäheriniň Halkara howa menzilinde Gurbanguly Berdimuhamedowy Özbegistan Respublikasynyň Premýer-ministri Abdulla Aripow we beýleki resmi adamlar, türkmen wekiliýetiniň agzalary garşyladylar. Howa menziliniň ýokary derejeli myhmanlary kabul ediş terminalynda Milli Geňeşiň Halk Maslahatynyň Başlygynyň bu ýerde garşy alan özbek wekili bilen gysga wagtlyk söhbetdeşligi boldy. Iş saparynyň maksatnamasyna laýyklykda, hormatly Arkadagymyz Türki Döwletleriň Guramasynyň Samarkant sammitinde çykyş eder hem-de ikitaraplaýyn duşuşyklary geçirer.
Özbegistan Respublikasynyň Prezidenti Şawkat Mirziýoýewiň başlyklygynda geçiriljek sammite gatnaşmak üçin gurama agza döwletleriň Liderleri — Türkiýe Respublikasynyň Prezidenti Rejep Taýyp Ärdogan, Azerbaýjan Respublikasynyň Prezidenti Ilham Aliýew, Gazagystan Respublikasynyň Prezidenti Kasym-Žomart Tokaýew, Gyrgyz Respublikasynyň Prezidenti Sadyr Žaparow hem-de gurama synçy hökmünde gatnaşýan Wengriýanyň Premýer-ministri Wiktor Orban hem Samarkant şäherine geldiler. Şeýle-de ýokary derejeli duşuşyga Türki Döwletleriň Guramasynyň Baş sekretary Bagdad Amreýewiň we bu köptaraplaýyn düzümiň beýleki ýöriteleşdirilen guramalarynyň ýolbaşçylarynyň gatnaşmaklary göz öňünde tutulýar.
Sammitiň gün tertibine ykdysadyýet, söwda, maýa goýumlar, ulag, innowasiýalar, ekologiýa, syýahatçylyk, medeni-ynsanperwer ulgamlarda köpugurly hyzmatdaşlygy mundan beýläk-de ösdürmek, BMG-niň Durnukly ösüş maksatlaryna doly laýyk getirmek maksady bilen, Türki Döwletleriň Guramasynyň işini kämilleşdirmek bilen bagly meseleler girizildi. Ýokary derejeli duşuşygyň jemleri boýunça Samarkant Beýannamasynyň kabul edilmegine, şeýle-de beýleki möhüm resminamalaryň birnäçesine gol çekilmegine garaşylýar.
