Tas 50 döwletiň we guramanyň liderleri BMG-niň Howanyň üýtgemegi baradaky çarçuwaly konwensiýasyna gatnaşyjylaryň 27-nji konferensiýasynda (COP27) ýurtlaryň geljekde gurakçylyga has gowy taýýarlyk görmegine kömek etmek üçin Halkara gurakçylyga durnuklylyk birleşiginiň döredilendigini yglan etdiler. Bu barada russian.news.cn habar berýär.
Senegal we Ispaniýa tarapyndan teklip edilen bu birleşik BMG-niň howanyň üýtgemeginiň täsirlerine garşy göreşmek boýunça anyk çözgüdi hökmünde döredilýär diýlip, täze gurluşyň beýanynda aýdylýar.
“Birleşigiň wezipesi ýerleri gurakçylyga we howanyň üýtgemegine has durnukly etmek üçin syýasy itergi bermekden ybarat” – diýip, Ispaniýanyň premýer-ministri Pedro Sançes we Senegalyň prezidenti Maki Sall bilelikde aýtdy.
Beýandan birleşigiň onuň işine goldaw bermek we goşmaça serişdeleri çekmek prosesini işjeňleşdirmek üçin täze syýasy borçnamalar, şol sanda Ispaniýa tarapyndan wada berlen 5 mln ýewro /5,01 mln ABŞ dollary/ möçberinde başlangyç gazna bilen berkidiljekdigi gelip çykýar.
Beýanda guramanyň esasy maksatlarynyň hataryna sebit başlangyçlarynyň jebislenmegine ýardam etmegiň, çaltlaşdyrylan innowasiýa alyş-çalşynyň, tehnologiýalary geçirmegiň we serişdeleri mobilizlemegiň hem degişlidigi bellenilýär.
Mundan başga-da, birleşik gurakçylyga durnuklylygy ýokarlandyrmak boýunça bilelikdäki işlerden ýokary peýda gazanmak üçin BMG-niň Baş sekretary we Bütindünýä Meteorologiýa guramasy tarapyndan başlanan irki duýduryş ulgamlary bilen ählumumy gurşawy üpjün etmek başlangyjy we dürli sebit başlangyçlary ýaly beýleki platformalar bilen hem hyzmatdaşlyk eder.
