Saud Arabystany patyşalykda elektromobil önümçiligine ýöriteleşen “Sir” ilkinji awtomobil brendini döretdi. Bu barada patyşalygyň mirasdüşer şazadasy Muhammed ben Salman habar berdi diýip, TASS belleýär.
“Saud Arabystany şu gün diňe bir täze awtomobil markasyny däl, eýsem doly derejeli senagat pudagyny döredýär” – diýip, Saud metbugat agentligi onuň sözlerini getirýär.
Maglumatlara görä, “Sir” hem içerki sarp edijiler üçin, hem Ýakyn Gündogaryň ýurtlaryna satmak üçin awtomobil öndürer. Bu taslamanyň 150 mln dollar möçberinde daşary ýurt maýa goýumlaryny çekmegine, 30 müň töweregi iş ornuny döretmegine, girdejililiginiň bolsa 2034-nji ýylda 8 mlrd dollar bolmagyna garaşylýar.
“Sir” Saud Arabystanynyň Garaşsyz gaznasynyň we Taýwanyň Foxconn elektronika öndürijisiniň bilelikdäki taslamasydyr, ýöne her bir awtomobil diňe patyşalygyň çäginde dörediler. Öndürilen ulag serişdeleriniň dünýä ülňülerine laýyklykda synaglary hem şol ýerde geçiriler.
Saud Arabystany tarapyndan öndürilen ilkinji elektromobil eýýäm 2025-nji ýylda satuwa çykarylar.
