2-nji noýabrda Russiýa Federasiýasyna resmi saparynyň çäklerinde Gurbanguly Berdimuhamedow Russiýanyň Federal Ýygnagynyň Döwlet Dumasynyň Başlygy Wýaçeslaw Wolodin bilen duşuşdy.
Wýaçeslaw Wolodin Russiýa bilen Türkmenistanyň arasynda strategik hyzmatdaşlygyň ösdürilmegine, parlamentara gatnaşyklaryň işjeňleşdirilmegine, iki halkyň dostlugynyň we özara düşünişmeginiň pugtalandyrylmagyna Gurbanguly Berdimuhamedowyň goşýan ägirt uly goşandyny belledi.
Gurbanguly Berdimuhamedow Russiýa Federasiýasynyň Federal Ýygnagynyň Döwlet Dumasynyň Başlygy Wýaçeslaw Wolodini hem-de wekiliýetiň agzalaryny mübärekläp, iki ýurduň parlamentara gatnaşyklaryny pugtalandyrmagyň geljegi barada pikir alyşmaga, kanunçykaryjylyk işinde özara tejribe alyşmaga oňat esas bolýan mümkinçilige şatdygyny belledi.
Gepleşikleriň barşynda ikitaraplaýyn ykdysady hyzmatdaşlyk meselelerine aýratyn üns çekildi.
Milli Geňeşiň Halk Maslahatynyň Başlygy şeýle hem ylym-bilim ulgamyny döwletara hyzmatdaşlygynyň ileri tutulýan ugurlarynyň hatarynda görkezdi.
Sport, ýaşlar syýasaty, gender deňligi meseleleri türkmen-rus gatnaşyklarynyň möhüm ugurlarynyň hatarynda kesgitlenildi.
Çykyşynyň ahyrynda Gurbanguly Berdimuhamedow Döwlet Dumasynyň ýolbaşçysyny özi üçin islendik amatly wagtda Türkmenistana sapar bilen gelmäge çagyrdy.
Russiýanyň Federal Ýygnagynyň Döwlet Dumasyndaky duşuşyk tamamlanandan soňra, Gurbanguly Berdimuhamedow «Maýendorf» döwlet kabulhanasyna tarap ugrady.
Türkmenistanyň Milli Geňeşiň Halk Maslahatynyň Başlygynyň Russiýa Federasiýasyna resmi sapary dowam edýär.
