Türkmenistanyň Prezidenti Serdar Berdimuhamedow Eýran Yslam Respublikasynyň Prezidenti Seýed Ebrahim Raisä ýurduň Şiraz şäherindäki Şah Çerag aramgähinde bolup geçen, köp sanly adam pidalaryna we şikes ýetmelerine getiren terrorçylyk zerarly gynanç hatyny iberdi.
“Türkmenistan terrorçylygyň we ekstremizmiň islendik ýüze çykmalaryny juda aýgytly ýagdaýda ýazgarmak bilen, bu apata garşy göreşmek we ony ýok etmek işinde dünýä bileleşiginiň tagallalaryny doly goldaýar” diýlip, hatda bellenilýär.
Döwlet Baştutan şu agyr pursatda gurban bolanlaryň dogan-garyndaşlaryna hem-de ýakynlaryna Türkmenistanyň halkynyň we Hökümetiniň adyndan, şeýle-de hut öz adyndan çuňňur gynanjyny, medet beriji sözlerini beýan etdi, ejir çekenlere bolsa tiz wagtda sagalmaklaryny dileg etdi.
Ýeri gelende bellesek, 26-njy oktýabrda Eýranyň Şiraz şäherinde ýerleşýän Şah Çerag aramgähinde bolan terrorçylyk zerarly azyndan 15 adam aradan çykdy, ýene 40 adam bolsa agyr ýaralandy. "IRNA" agentligi Fars welaýatynyň gubernatory Esmail Mohebbipuryň sözlerine salgylanyp, ot açyşlygyň bir terrorist tarapyndan gurnalandygyny, onuň ýaralanyp, tussag edilendigini ýazýar. Terroristleriň ýene biri hem tussaglyga alyndy.
